Wenn…

von Kornelia Apfelbeck

“…für Hermann – zu unserem Hochzeitstag am 10. August!”

Frühlingsbrotzeit für zwei, 14.03.25: “Ich habe heute den Tisch zum Abendessen gedeckt und dabei das Foto "Frühlingsbrotzeit für Zwei" gemacht. Der gedeckte Tisch hat mich so an meinen Text erinnert.”

Wenn de Parklückn bloß 5 cm länga  wia as Auto is.

Wenn I ned woas, was I in des depperte Formular nei schreiben muas.

Wenn I mi ned entscheidn ko, ob des blaue oda des gelbe Kleidl bessa passt.

Wenn I so an grossn Appetit auf knusprige Bratkartoffen hab.

Wenn da IKEA de verkertn Schraubn zum Schrank packlt hat.

Wenn I wida 2cm. z kloa bin, daß I de Glühbirn in de  Lampn neischraub.

Wenn a Schtückl Kuacha z groß is für mi alloa.

Wenn I im Kino sitz und Schluckauf kriag vor lauta Lacha. 

Wenn I ma üba so an Riesndeppn so richtig as Mai zerreißn mechad.

Wenn I mi so gfrei, daß ma a Lacha ins Gsicht nei hupft.

Wenn as Marmaladglasl ned auf geht und da Koffa ned zua.

Wenn I an Arm brauch, der mi hoit beim Woana.

Wenn I manchmoi so alloa bin unta am Haufa Leit.

Wenn I ned woas, wo I ofanga soi weil's Lebn wida 1000 Sachn gleichzeitig von mia mechad.

Dann, ja dann brauchad I di eigntlich da, ganz nah bei mia!

10. August 2024